وحـشـتـيـنـــــــــــــــا

بلدنا ما بقتش لينا .. و بقينا فيها أغراب

بنمشي فيها تايهين .. واحنا مش عارفين

شوارعك يا مصر اتغيرت

حتي لون التراب

لونه اصبح رمادي وسوادي

ما يفرقشي

المهم اعرف امشي

ما خبطشي

حتي الكلام دلوقتي

ما يعجبشي

ولو عجبني الكلام

ما بفهمشي

وانا في الغربه نادتلك

وقلت يا بلدي وحشتيني

ليه ترميني

كان المفروض تقابليني

تضميني

سألت ومين يجاوبني

يقولي مصر رايحه لفين

فوق ألألفين بقت عشره

ولسه جايه سنين وسنين

ومش ناسيين

تاريخنا وحضارتنا

ولمتنا

ونقول يامصر غنوتنا

غبتي شويه وحشتينا

إمتي ترجعي لينا

وحشتينا .. وحشتينا

عطر التراب

يا دوبي هابدأ أمسك قلم

وأخط بيه علي سطر الألم

وأكتب كلامي من العدم

ولا يبقي عندي ذرة ندم

وأشوف حروفي بتترسم

رسمة شموس بتبتسم

والكلمة من سن الوسم

تحكي حكاوي الصحراوية

وتشق بيه درب العيون

وتشوف جفون مرغرغة

والدمعة لامسه خدها

وعلي نحرها خط السبيل

ويا الدليل مادد إيديه

وقال دي نجمة في السما

متوسمة فيا الأمان

تسمع كلامي في السكوت

لو حتي يجي وقت المنام

وتشد إيدي في الظلام

وفي حضنها ريحة تراب الصحراويه

والنسمة جاية مهفهفة .. متلهفة

تحضن حبيب ماسك معاه ورقة وقلم .........

مين اللي قال لأ

مين اللي قال ؟؟!!.....

مين اللي قال كتر الكلام ممنوع

مين اللي قال صوت الحقيقه مسموع

مين اللي قال ان الغلط مرفوع

مين اللي قال ان الطريق مقطوع

مين

اللي قال خلاص .. توب الحيا مخلوع

مين اللي قال ان الفقير حايجوع

مين اللي قال ان الفساد مشروع

مين اللي قال إن الشجر م الأرض مقلوع

مين اللي قال إن اللي ضاع مننا مرجوع

مين اللي قال إني من المرض موجوع

مين اللي قال ..

مين اللي داء طعم المرار وكان مبلوع

مين اللي صحي م الحلم وكان مفزوع

مين اللي راح للحكومه وقعد عندها ملطوع

مين في مجلس الشعب قال عننا موضوع

مين منهم من غلا الأسعار ملسوع

مين في البلد له ضهرسانده وكان مشفوع

مين اللي عاوز ناس البلد في خنوع

مين اللي قال الحق

مين اللي ليهم قال لأ

تساؤلات مشروعة

ليه ؟ سايب الشعب يخبط في بعضه

ليه ؟ حاطط ناس تحكمه و بتاكل في عرضه

ليه ؟ ساكت علي اللي بيسرق تملي في ارضه

ليه ؟ المريض وزير الصحه مش عاوز يعالجه

ليه ؟ الشباب الحر علي طول عسكرك ضاربه

ل

ليه ؟ المغلوب علي امره ظالمه والظالم مسانده

ليه ؟ الفساد كتير ومش عاوز حد مننا يحاربه

ليه ؟ الكلام الصح علي طول الخط انت كمان رافضه

ليه ؟ الشعب همومه كترت قوي والفرح معانده

ليه ؟ مخلي اللي فينا يجرب ومش راحمنا من تجاربه

ليه ؟ مش شايف اللي خيرالبلد عيني عينك سارقه وناهبه

لو ماسألتكش حاسأل مين..

مش برضه انت الراعي والأمين

جاوب .. بس يكون الجواب رزين

يا إما عند مولانا تروح تقعد هناك جنبه !

كلام واحد مخرف

تخاريف واحد مخرف
بيقول كلام يقرف
بس عاوز تشوفه
في الجرايد مشرف
بيقول كلام كتير
عمال علي بطال
وع الفاضي والمليان
ولو انه كاتب شهير
بيكتب في جرنان
بيحب كتير يدش
كلام ما يتنشرش
بيقول كلام كتير
قالوا رئيس تحرير
مابيعرفش في التعبير
دا بيخرف وبينط
وشكله شكل القط
بيقول كلام كتير
وبيرغي ولا الحلاق
كأنه بيدق كفته
وبيفرد في الرقاق
ومخه شغال يخرف
وبيكتب فوق المقاله
ان ابوه الدقاق
بيقول كلام كتير
وملهش في التقدير
صحافه بتاعة حكومه
ماسكها تابع وزير
والكل رايح يخرف
ويقول كلام محرف

مواعظ مفيدة

قال مالك بن أنس "رضي الله عنه" : بلغني أن ملكا من ملوك بني اسرائيل ركب يوما في زي عظيم وموكب هائل ولم يترك شيئا من سنن الملوك الأقدمين حتي فعله فهال ذلك الجند والناس فمر برجل يعمل شيئا مكبا عليه ولم يلتفت الي جهة الملك فوقف الملك عليه وقال له : أري كل الناس ينظرون الا أنت ؟ فقال الرجل : أيها الملك اني رأيت ملكا مثلك وكان علي هذه المدينه مات هو ومسكين في يوم واحد فدفن الي جنبه فكنت أعرفهما بشخصيهما ثم أعرفهما بقبريهما ثم جاءت ريح عاصفة فنسفت قبريهما وكشفت عنهما وخلطت بين عظاميهما فلم أعرف الملك من المسكين ، فلذلك أقبلت علي عملي وتركت النظر اليك , قال فتضاءل له الملك وانصرف وتركه في حاله ، فسبحان مفني الأمم ومعيد الرمم سبحانه وتعالي جل ذكره .

___________________________________

يقال أن الرشيد قال للسماك . عظني وكانت بيده شربة من ماء . فقال : ياأمير المؤمنين أرأيت لو حبست عنك هذه الشربه أكنت تفديها بملكك ؟

قال نعم .قال : ياأميرالمؤمنين فلوحبس عنك خروجها أكنت تفديها بملكك ؟ قال نعم . قال : لاخير في ملك لا يساوي شربة ماء ولا بولة ، فبكي الرشيد عند ذلك .

____________________________________

وقال علي كرم الله وجهه لأسقف قد أسلم : عظني . قال : ياأمير المؤمنين ان كان الله عليك فمن ترجو . قال : أحسنت فزدني . قال : ان كان الله معك فمن تخاف . قال : أحسنت فزدني .قال : هب أن الله غفر ذنوب المسيئين أليس قد فاتهم ثواب المحسنين ؟ قال : حسبي حسبي ، وبكي علي أربعين صباحا ..

من نوادر الكلام

كتب بعضهم إلي صديق له _ وقد تأخر عنه كتابه : إن كنت لا تحسن الكتابه فهي عاهة ، وإن كنت تكتب ولا تكاتب إخوانك فهو كسل ، وإن كنت تكتب وليس لك قرطاس ودواة فهو سوء تدبير ،وإن اعتذرت بغير ما كتبت فهو وقاحة ..

________________________________

قال قائل : ما أدري كيف أصنع ؟ أغيب فأشتاق ، وألقي فلا أشتفي . ثم يحدث لي اللقاء نوعا من الحرقة ، للوعة الفرقة .

________________________________

آخر : رأيتني فيما أتعاطي من مدحك كالمخبر عن ضوء النهار الباهر ، والقمر الزاهر الذي لا يخفي علي ناظر ، وأيقنت أني حيث أنتهي
من القول منسوب إلي العجز ، ومقصر عن الغاية . فانصرفت عن الثناء عليك إلي الدعاء لك ، ووكلت المعلوم عنك إلي علم الناس بك .

__________________________________

لاتطلبوا الحاجة إلي ثلاث : إلي كزوب فإنه يقربها عليك وهي بعيدة ، ويباعدها وهي قريبة ، ولا إلي أحمق فإنه يريد أن ينفعك فيضرك ،
ولا إلي رجل له إلي صاحب الحاجة حاجه ، فإنه يجعل حاجتك وقاية لحاجته .

__________________________________

الدنيا تطلب الهارب منها ،وتهرب من الطالب لها . فإن أدركت الهارب منها جرحته ، وإن أدركها الطالب لها قتلته .

__________________________________

أعلم : فإن الصدق أمانه ، والكذب خيانه ،والإنصاف راحه ، ، والإلحاح وقاحه ، والتواني إضاعه ، والصحه بضاعه ، والحزم كياسه ،
والأدب سياسه ، والمرؤة رياسه ...

كلام في النهار

نخش في الموضوع علي طول.. لما الواحد يقوم من النوم الصبح . لما كان فيه صبح.. دلوقتي ليلنا ذي نهارنا مبقاش فيه ليل ولا بقي فيه نهار..ربنا سبحانه وتعالي جعلنا اليل علشان الراحه والسكون ، والأستمتاع بما أحله الله لنا من متع حسيه ..علشان اللي معندهوش عيل

يديله عيل واللي عاوز يراضي شريكته يعرف يراضيها والكل يكون مرضي..ده باليل..وجعل لينا النهار علشان نشتغل ونجيب فلوس
ومتطلبات المعيشه ،ونسعي فيه وندور علي المصالح وربنا قال (هوا الذي جعل لكم الأرض ذلولا فامشوا في مناكبها وكلوا من رزقه و إليه النشور)وقال ايضا (وجعلنا الليل لباسا . وجعلنا النهار معاشا )يعني كل حاجه اتعملت لينا علشان نعيش كويس .. احنا بقي قلبنا كل حاجه وخلينا كل حاجه خلف خلاف..وقال ايه الحكومه عاوزه ترشد استهلاك الكهربا .. وتقطع النور في الشوارع ، وتقفل المحلات الساعه سبعه..نرجع..
بقي لما الواحد يقوم من النوم الصبح .. الصبح بتاعنا بقي الساعه كام ؟ الصبح دلوقتي بقي الساعه اربعه أو خمسه بعد الظهر.. يعني مفيش صبح .. ده حتي الديك دلوقتي ما بنسمعش صياحه .. والحمار بطل ينهق ، والعصفور بطل يصوصو..الكلب كان يلف ويجري طول اليل
يدور علي الكلبه بتاعته.. دلوقتي بطل ..لأنه لقي حد بيشاركه في اليل اللي كان ليه لوحده.. ده حتي النهار عدي من زمان ، ومعادش فيه
يانهار ابيض .. بقي فيه يانهار أسود.. ياناس فوقوا بقي بعدين حا تطمش عليكم ولا حايبقي فيه ليل ولا نهار، واسمعوا صوت الآذآن وهوا بيقول حي علي الفلاح..بدل ماتسمعوا اللي بيقول انا كنج كونج انا مش خورنج.. ويالله نفوق ونصحي قبل ما الوقت يضيع علينا........

كلام فارغ

بحكم اني من البلد دي وعارفها وعارف ناسها ، وحواريها حاره حاره وحته حته ..لكن فيه حاجات جديده بتحصل اليومين دول وشدني موضوع جديد هومش جديد قوي لأنه حصل مره قبل كده .. موضوع وفاء قسطنطين علي ما اذكر .. المهم الموضوع الجديد هو كاميليا شحاته

اخبار كتيره في الصحف والتلفزيون والراديو ووكالات الأنباء العالميه والمحليه والشوارعيه كاميليا اتخطفت يارجاله ، واعتصامات ووقفات احتجاجيه ، ومنظمات حقوقيه ، ودوليه ! والموضوع انها زعلانه من جوزها سابتله البيت وطفشت .. طيب والله ياجماعه انتو اخوانا
في الوطن وبنحبكم .. ليه الموضوع ياخد اكبر من حجمه .. مواطنه مصريه غابت عن بيتها ؟ فيها ايه نروح نعمل بلاغ تغيب وخلاص ..

بلاش من الفتنه لأنها وحشه ... مش كده ولا ايه..!

فيوزات ضاربه

مش عارف انام ..انا عايز انام .. مخي ( عقلي ) شغال اربعه وعشرين ساعه . افكر شويه في موضوع ابص الاقي نفسي في موضوع تاني.. ايه اللخبطه دي. حتي اللخبطه اطلخبتط معايه .. هيه ليه الأمور دخلت في بعضها كده.. وعيشه دخلت علي ام الخير علما بأنهم بعيد عن بعض.. رحت لطبيب نفساوي علشان اشوف حالة القلق اللي ركباني ومجناني وقلقت منامي يمكن يريحني .. الدكتور بعد ما سمع حالتي النفساويه قالي الحاله اللي عندك ملهاش علاج عندي ؟ ليه يادكتور! قالي الكهربا اللي في مخك دخلت علي بعض وعملت قفله.. وانا لو اديتك جلسة كهربا الفيوزات اللي عند ك حاتتحرق وتعيش من غير فيوزات .. يانهار اسود اعيش من غير فيوزات .. طب وبعدين يادكتور.. قالي هوا حل واحد قدام منك .. تروح لواحد عراف يعرف يعملك حاجة .. انت حالتك صعبه قوي .. فضلت ادور علي العراف مالقيتش لحد ما قابلني راجل كبير الفيوزات بتاعته لسه معاه . قالي بص يابني مفيش عراف ولا حاجه لو كان فيه حد بيعرف كان انصلح حالنا .. لوحد بيعرف في التعليم كنا اتعلمنا كويس .. لوحد بيعرف ازاي يعمل شغله كانت كل حاجه طلعت مظبوطه.. يابني الفيوزات بتاعة الحكومه ضاربه كلها ، ولما فيوزات الحكومه تضرب .. لازم فيوزات الناس تضرب.. هو احنا برضه مش تبع شبكة الحكومه؟ ولا الحكومه في شبكه واحنا في شبكه تانيه.. روح طفي النور ونام يمكن تنام ما تقومش .....!

رؤيا فلسفية

إن الديمقراطيه آليا - بغير نفاق التصويت والانتخاب - تعني مساواة تامة في الفرص ، أمـــــام الجميع ، وخصوصا في التعليم ، ولاتعني تناوب "توم" أو "هاري" للمنصب العام .. ويجب ان يكون الاختيار نابع من الشخصيه الذاتيه للفرد وليس لحزب او حكومه ، ويجب علي من يديرون العمليه الانتخابيه ان لا يكون لهم الا الأشراف علي العمليه التنظيميه فقط لاغير ، ويجب ان تكون المراقبه عليها من المنظمات الحقوقيه المدنيه ، وليس من حراس الدوله والحكم ، وليختار الشعب من يختاره ، ويجب علي من يتقدم الي العمل العام ان يكون علي قدر من المسؤليه الحسيه ، وان يكون قد تلقي من التعليم القدر الذي يؤهله لهذا المنصب ، ولافرق هنا بين ابن الحاكم او ماسح الأحذيه .. المقدره في العلم الذي تحصل عليه كل منهم ، ولايجب ان تكون الوراثه في المناصب أو المميزات هي العقبه الغالبه امام المواهب والكفائات اينما وجدت ومن من ولدت .. ويجب ان ننظر الي الوضع الأساسي وهو رأس الدوله أو ما يليه من المناصب الرفيعه . فكيف يعقل ان يكون صاحب هذا المنصب الرفيع الذي بيده مقاليد الامور في حياتنا ان يصل من العمر الي الستين او السبعين او الثمانين ولا يريد ان يترك المكان لغيره . بطبيعة الحال الانسان اذا وصل الي هذه المرحله من العمر فأن حجم المسؤليه يؤثر علي مرونة العقل ويجففها ، ولا يجب ان يكون الحاكم انانيا في التسلط بحب المنصب وان يعطي لشخصه ( لنفسه ) فتره من الوقت لكي يفرح امام العامه بما انجزه من اعمال خيره لأمته ...

آخرة السكاته ايه

من بعد الشماعه اللي بنعلق (بنعلأ) عليها كل حاجه في حياتنا ؟ تعالوا نتكلم شويه علي السكاته ( البزازه ) طبعا السكاته بنديها للطفل ( العيل ) اللي لسه مولود علشان يبطل عياط أو صريخ .. وفي بعض ألأماكن مسمينها ( اللهايه ) اللي بيلهو بيها العيل يتلهي بيها ويبطل ذن , والجماعة الأغنياء بيسموها التيتينا (Tetena) واحنا دلوقتي في بلدنا الكل عاوز بزازات .. الشعب نصه قول التلتين منه بيصوت : مش بيصوت في ألأنتخابات لأ .. بيصرخ من اللي هوا فيه ..شويه منه بيعيطوا من الأمراض اذا ماكنش كله . وشويه منه من الطوارئ . وشويه منه من الميه اللي اتلخبطط مع المجاري.. وشويه منه من الأجور اللي مش مكفيه المعيشه..وشويه منه من الدروس الخصوصيه.. وشويه منه من الزحمه والمرور.. وشويه منه من عدم العداله بين الناس وبعضها .. الأسباب اللي بتخلينا نعيط ونصرخ كتيره لا تعد ولا تحصي . وكل ما نعيط يدونا البزازه يلهونا بيها شويه وأنا شايف وغيري شايف أن البزازات خلصت خلاص وهمه غلبوا وغلب أمرهم مش عارفين يعملوا حاجه يلهوا بيها الناس ؟ والناس مش حتسكت لأنها اتعلمت الصراخ .. بس ياتري بعد الصراخ ايه ؟؟؟؟

تعليقات ( شماعات )

حأجات غريبه دلوقتي بتحصل ! ومنها اننا نحب نعلق أخطائنا علي أشياء تانيه ملهاش أي صله.. يعني مثلا مثلا لما تيجي تكلم أي حد في موضوع ما . تقوله أنت مكلمتنيش ليه ؟ يرد يقولك معلش أصل ماكنش معايا رصيد ..تيجي تقول هوا خالد سعيد مات اذاي ..يردو يقولوا أصل بلع بانجو..تيجي تسأل عن نواب العلاج السبعه.. اللي اخدو حق الغلابه ؟ يجيلك الرد . احنا ما نقدرش نقول علي اسامي لأنه التحقييق لسه ماخلصش (طيب التحقيق مع مين؟) لو حبيت تسأل عن أي حاجه حاصله في البلد حاتلاقي ميت شماعه وشماعه يعلقوا عليها كل حاجه ..والشماعات دلوقتي بقت عرف متعارف عليه .. ياسيدي قلهم أي حاجه سكتهم بيها.. ده........أهبل ما بيفهمش.. والشماعات دلوقتي بقت كتير. وأحلي وأحدث شماعه..أن البرادعي ما كانش عايش في مصر.يعني مش فاهم مشاكل مصر.. ياسيدي طيب اللي عايش في مصر ماحلش مشاكلها ليه.. دي بقي ملهاش شماعه دي ليها سكاته.. والي اللقاء مع السكاته.........!!!!!!!!!!!!!

تخاريف

لما الواحد مننا تجيله حالة قلق وتوهان يعمل ايه ؟ لئيت نفسي كده ركباني الحاله ديه ؟ ام العيال ألتلي.. اطلع بره فك علي نفسك شويه . يمكن الضيئه تروح .ويارب تروح ماترجعش .. قول آمين . المهم قلت اتمشي علي الكورنيش يمكن شوية الهوا بتوع البحر يخلوا الواحد يعرف يشم النفس .. ويمكن لما الواحد يشوف شوية بنات حلوين بيتئصعو كده.. والدلال بتاع اليومين دول سايء دلاله معاهم.. رحت قعدت ع السور بتاع الكورنيش ، ومسكت في ايدي كوز دره مشوي وأعدت آكل وعنيه رايحه جايه . اتفرج علي ماخلييء ربنا اللي ماشيه أدامي ! ايه ده هوا انا بأالي كتير مجتش هنا ولا ايه ..شباب ذي الفل طول وعرض البنطلون بتاعه نازل وخلاص حيكشف حاجات مش لازم تبان.. ولا الحديده اللي علي الحذام .. وكمان لقيتهم عاملين شعرهم وائف كده منفوش عامل ذي الديك الشركسي بتاع زمان .. ولا البنات . ياعيني ع البنات.. ولا المحذأ والملذأ ..حاجات كده بارزه من ورا وأدام ،وشايف مرتفعات ومنخفضات . ماتئولش مرسومه بريشة فنان . ولا الجذم الجديده الواحده عامله ذي عساكر الخياله الجذمه لحد الركبه وفوء الركبه مفيش ، ولا الحجاب ياخرابي ع الحجاب . آخرجنان ماتئولش همه مركبين فيه مراوح.. المهم شوية الهوا لطشوني ورحت نايم علي نفسي وقعدت احلم.. البنت دي معايا ولا دي ولا دي .. صحاني من غفوتي صوت الضحكه الرنانه لئيت بنت عماله بتكلم نفسها ، وأعدت أبص وأبحلئ لاقيتها رابطه الموبايل ف الحجاب .. ألت والله العظيم الواحد حارم نفسه .. مش كفايه عليه انه ما بيكلش لحمه...

كلام في الصميم

صباح الخير..أومساء الخير..المهم..تعالو لما احكيلكم حكايه حصلت معايه ..ف يوم من ايام السنه اللي هيه الفين وعشره ..وربنا يدينا ويديكم العمر..دخلت البيت لقيت ام العيال بتقولي فيه جواب من بتوع الحكومه جابه البوسطجي .. قلت خير اللهم اجعله خير..انا مفيش ليه تعامل مع الحكومه..لأني ماشي جنب الحيط.. وبخاف اتعامل معاهم في اي حاجه.. مفيش غير وصل الكهربا واوصل الميه اللي انا كل شهر باستناهم.. المهم.. فتحت الجواب بتاع الحكومه لقيته.. احضر للشهر العقاري قسم المطالبات .. أعدت اسأل نفسي ..هوا في ايه انا معنديش املاك ولا انا عندي توكيلات ولاحاجه..رحت الشهر العقاري وريتهم الجواب قلولي قسم المطالبات فوق .. طلعت السلم وانا خايف لقيت الموظف خد الجواب وراح جايب دفتر كبيـــــــــــــــــــــــــــــــر .. وقالي عليك ثمانيه وعشرين جنيه يا استاذ.. قلتله بتوع ايه ..قال : فرق رسوم عقد شراكه مع اخوك في سنة 1982..طيب انا لما عملت عقد الشركه طبيعي دفعت الرسوم ..قالي يا استاذ الجهاز المركزي للمحاسبات لقي عليك فرق في الرسوم حتدفع ولا نحولها قضيه في المحكمه .. ودفعت .. ربنا يكفينا شرهم.. المهم .. بعد 28 سنه الحكومه بطالبني بكل سنه جنيه واحد.. سئلت نفسي : لو الحكومه كده شاطره ومش بتسيب حاجه.. ليه سايبه التقارير اللي الجهاز المركزي بعتها ليها ولمجلس الشعب ؟؟ والله حاجه تلخبط ..يا تري ويا هل تري.. الحكومه ناويه تدور علي حق الشعب ذي ما بتاخد الفرق في الرسوم اللي ملهاش لزوم..!

تخيلات وانا صاحي

تخيل ....لو الواحد يصحي من النوم الصبح يروح يشتري الجرايد مايلقيش فيها اخبار عن الفساد.. فيه حد يشتريها.. طيب لو مفيهاش اخبار الحوادث .. وكمان الرياضه ..طيب لو مفيش اعلانات..يبقي دور النشر حاتفلس..الواحد لما بيقرا الخبر بيكون مستني ايه اللي حايجري من بعد الخبر.. بس انا وجميع قراء الجرايد مش شايفين رد فعل.! يعني لما يجي خبر عن حرامية ألأراضى ؟؟ طبيعي نستني لما نقرا ايه اللي حصل. مسكوا الحراميه ولا لأ.. لما نقرا خبر عن رشوة مرسيدس .. لما نقرا خبر عن الشركه الألمانيه والمشروع خلاص اتسلم.. أخبار كتير من النوعيه ديه ملهاش جواب.. هوا أد كده احنا الجماعه دول مستهيفنا .. بس اللي محيرني ومعكنني ومخليني افكر همه ليه ساكتين ومتقبلين الشتيمه والصفات المشينه اللي منشوره في الجرايد؟؟ ياجماعه الموضوع فيه حاجه غلط.. غلط مننا ، ولا منهم.. والله انا مش عارف .. واللي يعرف يقولنا.. ولا في بلدنا العارف لا يعرف ؟؟...!