اطعم الفم تستحى العين

قابلنى بعد غياب السنين :ــ
كنا زملاء الدراسة ، واتفرقنا بعد المرحلة الأبتدائية وكل
واحد شق طريقه فى الحياة ، واتغيرت الملامح وشكل الطفولة
راح وجه مكانه شكل تانى ، أنا شعر راسى خط فيه البياض
وهو لسه ماشالله عليه ؟ كأنه ابن عشرين تلاتين ، وعرفنى
أول ما شافنى ، وحكينا ذكريات الطفولة واسترجعنا أيام الشقاوه
ولما خلص الكلام قالى : أنا عازمك عندى لأنى عامل حفل على
شرف النائب بتاعنا الجديد فى مجلس الشعب مانت عارفه .....
اللى كنا بنعمل معاه عمايل فاكر لما كان يجى عندكم أنا وهو نذاكر
والحاجه تعمل لنا سد الحنك ، كانت أيام ، واستكمل أوعى متجيش
العنوان معاك ، وجه الميعاد ولبست الحته اللى ع الحبل واتهنتفت
وخدت بعضى ورحت ، ولقيت ناس كده أفنديه واقفين على باب
الفيلا وسألنى واحد منهم رايح فين ياسيد ؟ قلتله : أنا مدعوا ـ المهم
دخلت وانا روكبى بتخبط فى بعض من اللى شايفه قدامى ؟
إيه ده ستات قمرات لابسين ملابس ذى اللى بنشوفها فى السيما ،
ولا إيه . كل واحد معاه واحده من الهوانم وياحسره أنا عمال اتفرج
وبس لحد ماعدى واحد كده زى اللى بنشوفه قدام محل الحاتى وشايل
صنيه على إيده ، وقدملى كبايه وفيها عصايه زى اللى بتسلك السنان
المهم محدش عبرنى لحد ماسمعت صوت بيقول : سيادة النائب
ولقيت الكل بيثقف ثقفت زيهم ، وقعد سيادة النائب يسلم عليهم واحد
واحد وكان مهتم بالجنس اللطيف أكتر ، لحد ما جه عندى ، ولسه
حاقول أهلا يا لقيت صاحبى قال خلاص خلاص وبعده عنى ،
وشويه وقال : البوفيه على شرف سيادة النائب ، ولقيت كله مسكله
طبق وقعد يحط فيه مالذ وطاب ، واخدت طبق ورحت اعمل زيهم
لقيت صاحبى قاللى انت رايح فين لأ انت أكلك فى مكان تانى وخدنى
ودانى المطبخ وسمعته بيقول للسفرجى أكلوه هنا مش عاوز فضايح
المهم سألت السفرجى هو بيعمل كده ليه دانا صاحبه وهو اللى
عازمنى ؟ السفرجى قال : انت باين عليك راجل طيب ، وانت مالك
والطبقه البرجوازيه المخمليه دى قلت والله أنا مليش دعوه بيهم ده
هو اللى عزمنى لأنه كان صاحبى ، وفضلت قاعد أتفرج عليهم من
ورا الباب لحد ماجه صاحبى اللى كان صاحبى ، وقلتله : انت ليه
مخلتنيش اتكلم مع صاحبنا ورد وقال ياأخى أنت فين وهو فين ،
ورديت وقلت : فين إيه وبتاع إيه دا لسه كان قاعد معانا ع القهوه
علشان الأنتخابات وبيتحايل علينا علشان نديله صوتنا ؟
رد وقال : انسى أنت عارف أنا عامل الحفله ليه ، قلت ليه . قال :
علشان . إطعم الفم تستحى العين ، والدنيا مصالح ياسى صالح ، تيجى
انت عاوز تبوظ الشغل اللى مظبطه . الدنيا دلوقتى شيلنى وشيلك ،
والنهارده ليك بكره ليه ، تعرف تعمل كده تسلك وتبقى عال ماتسلكش
خليك مكانك فهمت ولا لاء ..

وللحديث بقية